छत्तीसगढ़ के सबले बड़का पंचायत विधानसभा म राजभाषा छत्तीसगढ़ी म संवाद अउ दूरदर्शन रायपुर छत्तीसगढ़ डहर ले स्थानीय भाषा म रिपोर्टिंग खातिर चिट्ठी!
सम्माननीय विधानसभा अध्यक्ष श्री डॉक्टर रमन सिंह जी जोहार
14 दिसम्बर ले छत्तीसगढ़ के बड़का पंचायत विधानसभा सत्र के शुरुआत नवा रायपुर के नवा अउ भव्य भवन ले होए बर जात हवे, आपके ही सरकार में बछर 2007 के आपके ही मुख्यमंत्री रहत हुए ऐतिहासिक निर्णय के संग 3 करोड़ छत्तीसगढ़िया के मातृभाषा छत्तीसगढ़ी ल राजभाषा के दर्जा मिलिस फेर अब ले छत्तीसगढ़ी अपन मान खोजत हे, एक दरि अउ आपके सत्ता शासन म छत्तीसगढ़ी अउ छत्तीसगढ़िया मन ल आस बन पड़े हे के हमर मयारू छत्तीसगढ़ी भाषा जल्दी ही नवा संसद ले 8वीं अनुसूची बर अग्रेषित होही!
14 दिसम्बर 2025 वो ऐतिहासिक दिन बन जाये जेन पबरित तिथि हमर राजभाषा सदन के हर सदस्य के मुख ले फुट के गुरु पर्व म महान संत गुरु घासीदास बाबा के मनखे मनखे एक समान के सूत्र वाक्य ल सउहंत करने वाला भाषा हमर महतारी भाषा के वैभव बाढ़य, ये दिन ले सदन के कामकाज, बहस परिचर्चा अउ जनमानस खातिर होवत रिपोर्टिंग घलो छत्तीसगढ़ी म होवय जेखर ले प्रदेश के भाषाई आधार मजबूत होही!
संग ही बीजेपी के कर्म वाक्य “हमने बनाया है, हम ही संवारेंगे” के विश्वसनियता गढ़हाही।
ये चिट्ठी के माध्यम ले सब्बो विधायक मन ले घलो निवेदन हे के उन अपन महतारी भाषा, राजभाषा छत्तीसगढ़ी म अपन भावना विधानसभा म रखयं अउ संवाद के माध्यम के रुप म राजभाषा ल बउरयं!
आदरणीय मुख्यमंत्री Vishnu Deo Sai जी सहित सब्बो जिम्मेदार सचिव, विधानसभा सचिव सहित दूरदर्शन रायपुर के महानिदेशक घलो इहि चिट्ठी ले संज्ञान लेवयं।
जोहार
गजेंद्ररथ ‘गर्व’, प्रदेश अध्यक्ष
छत्तीसगढ़िया पत्रकार महासंघ
