21 अक्टूबर 2023 पगबंधी जोहार के सुरता
छत्तीसगढ़ के गैर राजनीतिक संगठन छत्तीसगढ़िया क्रांति सेना के राजनीतिक धड़ा जोहार छत्तीसगढ़ पार्टी के स्थापना तिथि!
कइसे भुलाए जा सकथे वो ऐतिहासिक दिन ल! तत्कालीन अध्यक्ष जिला ग्रामीण रायपुर के जिम्मेदारी के संग राजनीतिक विंग के पगबंधी के दिन, विधानसभा चुनाव के पहिली सीजन के नामांकन हो चुके रहिस तब, चुनाव के बहुत कम दिन बांचे रहिस, पार्टी के नाम घलो पता नइ रहिस CKS के सेनानी मन ल! मुखिया मन बताते नइ रहिन, प्रदेश संरक्षक घलो राजनीतिक दल के टाइटल ले अनभिज्ञ रहिन, अइसे ओखर कहना रिहिस! राष्ट्रीय राजनीतिक दल के बड़का षड्यंत्र के डर रहिस, अइसे सुनन?
एक जोरदार सभा के आयोजन, प्रदेश भर के सेनानी मन के जुराव म पगबंधी जोहार होइस, प्रदेश ल एक प्रांतीय राजनीतिक दल मिलगे, येखर पहिली हमरे संग के आदिवासी समाज के साथी मन हमर राज पार्टी बना के नामांकन घलो भर दे रहिन! मोर मन अकुलात रहिस, हर कार्यक्रम म संग रहे गैर राजनीतिक संगठन CKS ले जुड़े आदिवासी समाज काबर अलग रद्दा चुन लिन? जबकि ओखर मन के हियाव खियाव म प्रदेश के सबले बड़का सल्ला गागरा बनाये के बीड़ा ऊंचे रहिस, कांसादान महाअभियान के 2 यात्रा सफल हो चुके रहिस, सवाल अब्बड़ रहिस मन म, एक विचारधारा, रद्दा अलग अलग काबर चुन लिन होही?
कोनो ये सवाल के जवाब नइ दिन आज तक! शायद इही बड़का कारण रहिस, मैं चुनाव सम्पन्न होये के तुरते बाद पार्टी के प्रदेश कार्यकारणी पद सहित प्राथमिक सदस्यता ले मुक्त होगेंव, फेर CKS ले स्वांसा भर तक अलगिया नइ सकंव!
विचारधारा प्रदेशवाद के कभू मरही का?
चुनाव ‘अब के बार बूढ़ादेव के सरकार’ के नारा ले शुरू करेन अउ लगभग 32 सीट म जमानत जप्त होगे, फेर ये मोर पहिली राजनीतिक दल अउ चुनाव के पहिली अनुभव रहिस, अब्बड़ सिखेन, पांव पांव धरसींवा विधानसभा ल नाप डारेन, कभू कहीं जिनिस खातिर कखरो लंग हाथ नइ जोड़े रहेन, पांव पर परके छड़ी छाप JCP के बैनर म उम्मीदवार अमित बघेल बर वोट माँगेन।
छत्तीसगढ़ म छत्तीसगढ़िया राज के स्थापना के भाव मन म लेके सबो सेनानी भाई बड़े बिहनिया बिन खाये डउकी लइका संग धरके गांव गली घुमत रहन, तब ज्यादातर साथी मन ल कोनो राजनीतिक अनुभव नइ रहिस अउ पहिली कोनो पार्टी के हिस्सा घलो नइ रहिन, हार जीत के निष्कर्ष ले दूर एकजुटता के मिशाल खरोरा म मुख्यालय बनाये, रणनीतिक जिम्मेदारी Priyankar Sen के हाथ, मैं वक्ता के रूप म अउ भाई Ramsharan Sahu Kharora कार्यालय प्रभारी के रूप म भिड़े रहन, उही बेरा ‘आप’ पार्टी के बुता करत खरोरा के साथी नवयुवक Ajay Kumar Verma Cks अउ ओखर पूरा टीम छत्तीसगढ़िया राज के कल्पना ले जुड़िन, सब साथी मन JCP खातिर जबर बुता करिन अउ आज घलो जुड़े हुए हें।
आज भले ही मैं JCP ले या कोनो भी राजनीतिक दल से अलग हंव फेर मोर विचारधारा छत्तीसगढ़ियावाद, छत्तीसगढ़िया राज के ही रही।
राजनीतिक सक्रियता ले दूरिहा राजनीति ल प्रभावित करे के विचार के संग छत्तीसगढ़िया क्रान्ति सेना के निर्माण होए रहिस, बेरा के मांग जनता के विकल्प देहे खातिर राजनीतिक दल बनिस फेर CKS हमेशा से आम छत्तीसगढ़िया के दुख पीरा, शोषण के खिलाफ, भाषा, संस्कृति खातिर मैदान म हे अउ अब ये बड़का विचारधारा बनके आम छत्तीसगढ़िया के अंतस म संचर गए हे आने वाला समय छत्तीसगढ़ म बड़े अउ सुखद परिवर्तन आही मोला पूरा विश्वास हे!
मोर अनुभव अउ जमीनी भाव ले भरे मोर एक पुस्तक जल्दी ही आप मन ल पढ़े बर मिलही…जोहार
गजेंद्ररथ ‘गर्व’
छत्तीसगढ़िया पत्रकार महासंघ
