सवनाही दवई
सावन लगे के एक अठोरिहा पहिली (आठ दिन पहिली) अषाढ़ के झरती म जाती-बिराती बैरागी महाराज मन हर गाँव -गाँव म जंत्र देबर आथे जेला सवनाही दवई के नाव ले जाने जाथे।
ये सवनाही दवई के गाँव के सियान मन भारी महत्व बताथे । सवनाही दवई ह गाय-गरू, माल-मत्ता, लक्ष्मी मन बर भारी लाभकारी हे कहे जाथे! दवई ल गाय के कोठा म बांधे ले गऊ माता मन के सुरक्षा होथे, घर के मोहाटी म बांधे ले घर-कुरिया के सुरक्षा होथे अइसे सियान मन कहिथे।
सवनाही दवई ल पीपर पाना म लपेट के,पटवा डोरी म बांध देथे। तहान बैरागी महराज मन गाँव-बस्ती म जाके घरो-घर बांटथे ये दवई ल।
सवनाही दवई के बदला म गाँव- बस्ती के मनखे मन बैरागी महराज ल अन्नदान के रूप म सेर-चाउंर (दार-चाउंर पताल मिर्चा नमक आलू) अउ दू-चार पैसा पुन-दान के रूप म घलो देथे। दान-धरम ले बैरागी महराज मन ल घलो घर-परवार चलाय बर जीविका के साधन मिल जाथे। उही किसम ले ये सवनाही दवई दे के उदिम पुरखा मन के पाहरो ले सदा दिन चलत आवत हे जेन हर आज घलो कई ठन गाँव- बस्ती म पुरखा मन के ये चलागन चलत आवत हे अउ बहुत अकन गाँव म नंदावत घलो हबय।
हमर घर बबा ह बैरागी महराज ल एसो फेर सोरियावत हे बबा हर दुवार के चौरा म बईठे हे अउ गली-खोर म अवईया-जवईया मनखे मन ल पूछत हे। कस जी, बुधारू ? ( गाँव के बरदिहा) तै तो संझा -बिहनिया पूरा गाँव म बस्ती भर ल घुम डारथस त बता-भला, एसो बांभन -बैरागी महराज मन के कुछू सोर-खबर नई हे ग, गजब दिन होगे ओखर मन के दर्शन नई हे, सवनाही देबर कब आही ?
बुधारू- का बताबे गो बड़ा (बडे़ ददा) आज उहू जिनिस मन दिनो-दिन नंदावत जावत हे खाल्हेपारा ले बस्ती भितर होवत ऐदे भांठापारा म घलो चंढ़ गेव। अउ गाँव भर के गाय ल दुहथव -बांधथव फेर, दू बछर होगे बैरागी महराज मन के महू आरो न नई पावत हव।
कबआथे – कब चले जाथे ते रे भई!
फेर हां महात्मा के पानठेला मेर अभिंच्चे डहरचलती सुने हव, ऐसो बैरागी महराज मन दवई देबर शनिच्चर के गाँव म आही।
ये गोठ-बात ल पुनाराम बबा अउ राधेश्याम कका ल गोठियावत सुने हव।
बबा:- बने बताये बुधारू फेर दिनो- दिन हमर लोक संस्कृति, लोक परब अउ रितरिवाज नंदावत जावत हे रे भई!
जब गाँव म ये हाल हे त शहर- नगर म तो कोनों पूछपरख नई होही। फेर नवा पीढ़ी मन ल जानकारी जरूर होना चाही।
ताकेश्वर साहू बचपन’
सुरहोली (बेरला) बेमेतरा।
9174023393
